धरानबाट २१ किलोमिटर उत्तरतर्फको यात्रापछि पुगिन्छ सुन्दर पर्यटकीय बजार भेंडेटार । समुन्द्र सतहबाट १ हजार ४ सय २० मिटर उचाइमा रहेको यो बजार पुग्ने जो कोही पनि लालायित हुन्छन् । सुन्दरताको व्याख्या यहाँ जति गरे पनि कम हुन्छ । पूर्वका सुन्दर स्थलमध्ये भेडेटार सबैभन्दा उत्तम हो भन्ने कुरामा दुईमत कसैको हुँदैन भन्ने मलाई लाग्छ । सुन्दरताका अलवा समय, मौसम र खर्चका कारण पनि यो बजार सबैभन्दा उपयुक्त छ ।
यहाँ पुगेपछि मन शान्त हुन्छ । शरीरमा स्फुर्ति भरिन्छ । यहाँको चिसोले जब शरीरमा स्पर्श गर्दछ त्यसपछि लाग्छ भेडेटार भनेको साँच्चिकै भेडेर रहेछ । चिसो हावासँगै आउने बाक्लो कुहिरोमा लुकामारी खेल्दाखेल्दै निथ्रुकै झरीले रुझेको धेरैलाई पत्तो नै हुँदैन । छिनछिनमा हुने मौसम परिवर्तन, घरी कुहिरो त घरी पानी अनि एकैछिनमा घाम छेपारोले रंग फेरेभन्दा विचित्रको छ यो भेडेटार ।
भेडेटारसँगको साइनो मेरो निकै पुरानो हो । बाल्यकालदेखि यसको हावापानीसँग परिचित छु । हुन पनि मेरो बाल्यकाल यही भेडेटारको फेदीमा बितेको हो । धरानको बसाई भेडेटारका लागि टाढा र विरानो हैन । तर मलाई थाहा छ सानोमा स्कुलबाट भागेर भेडेटार पुग्दा होस् या घरमा बाआमालाई ढाँटेर साथीसंगीसँग जाँदा होस् । त्यहाँ पुगेको गनिसाध्य छैन । तर जति पटक गए पनि भेडेटार हरेक पटक मेरा लागि नयाँ र जाउँजाउँ लाग्ने स्थानमा पर्छ । हरेक पटक मेरा लागि भेडेटार प्रिय लाग्छ । हुन त बेलायतका राजकुमार चाल्स डेबिटलाई त मोहित पार्ने यो भेडेटारले मलाई के छोड्थियो होला र ? दक्षिण पूर्वमा रहेको नाम्जे गाँउ र त्यहाँको होमस्टे, डाँडामा रहेको आत्माघर, अलि तल झरेपछिको नमास्ते झरना यसका गहना हुन् । शिरमा रहेकी सानी पाथीभरा देवीले सबैको रक्षा गरेजस्तो लाग्छ ।
हो यी र यस्तै दृश्य बोकेर म यस पटक पनि भेडेटार उक्लेकी थिएँ । सधैं मलाई उत्साहित बनाउने भेडेटार यसपटक मलाई सहासिक बनाउन प्रतीक्षारत रहेछ । जब म भेडेटार पुगें, मेरो पहिलो रोजाइ विगतको भन्दा फरक थियो । म भर्खरै सुरु भएको जिपलाइनमा पुगें । केही दिनदेखि सञ्चार माध्यम र सामाजिक सञ्जालमा निकै छाएको जिपलाइनले मलाई तानिरहेको थियो । उद्घाटनकै दिन धरान उपमहानगरपालिकाकी उपमेयरले खेल्नु भएको देखेपछि मेरो मन निकै उत्सुक भएको थियो । यो साहसी खेल पुरुषका लागि मात्र हैन भन्ने मेरो मनमा पहिलादेखि नै थियो । त्यसलाई प्रमाणित उपमेयरज्यूले गर्नु भएको त थियो नै तर खेल्दाको मजा लिने पक्षमा म थिएँ ।
भेडेटारमा सञ्चालनमा आएको जिपलाइनमा सिङ्गल क्लासिक, कपल क्लासिक अनि सुपरम्यान गरी तीन साहसिक खेल खेल्न पाइन्छ । मेरो रोजाइ सुपरम्यान थियो । यस्म सुतेर दुवै हात फिजाएर चराझैं उड्न मन थियो । तर उड्न सोचे सजिलो कहाँ हुँदोरहेछ र । भेडेटार मौसमभन्दा चिसो मेरो मन चिसो भइसकेको थियो । सुरक्षागार्ड लगाउँदै गर्दा एक मनले सोचें डोरी चुडियो भने…? अर्को मनले सोचें दुनियाँले गरेको काम गर्न नसक्ने म लाछी महिला हैन । तथापि मनमा आँट भए पनि मुटुका धड्कनको बेग बढिरहेको थियो ।
दुवै आँखा चिम्लिनु मन लाग्यो । आँखा चिम्लन नपाउँदै म हावामा चरी जस्तै उड्न थालिसकेकी थिएँ । डरका अगाडि जित हुन्छ भन्ने कुरा याद आयो । म जित्न चाहन्थें डरलाई फेरि एकपटक डरलाई हराए । हात फिजाएर, ‘म पंक्षी हुँ’ भन्ने गीत गुनगुनाउन मन लाग्यो, जब बीचमा पुगें थोरै डरको मात्रा बढ्ला जस्तो भएको थियो । दुवै हात छातीमा राखें आफैंले आफैंलाई ढाढस दिएँ । जब ३५ सेकेन्ड पार गरेर ल्यान्डिङ पोइन्टमा पुगें आफैलाई आफैसँग खुसी लाग्यो । ६ सय ५० मिटर पार गर्न ३५ सेकेण्ड लागेछ । ३५ सेकेन्ण्ड जीवनको अत्यन्तै रोचक पल रह्यो । त्यहाँ जिपलाइन हेर्न आएकाहरू भन्दै थिए– ‘उहाँले सुपरम्यान खेल्नु भएको हो ।’ मैले नि भनें– ‘पुरुषले खेल्दा सुपेरम्यान महिलाले खेल्दा सुपरवोमेन ।’
घुमघाम मिडिया प्रा.लि. विराटनगर, मोरड.
पर्यटन यात्रा डट कम {paryatanyatra.com}
सूचना तथा प्रसारण विभाग दर्ता : १६१५-०७६-२०७७
अध्यक्ष: भविशकुमार श्रेष्ठ
प्रबन्ध सम्पादक: लीलावल्लभ घिमिरे
सम्पादक: निरज दाहाल
कार्यकारी सम्पादक : मीनकुमार नवोदित
व्यवस्थापक : ज्ञानमणि नेपाल ,फडिन्द्र अधिकारी
सम्पर्क ९८५२०२३४२२, ९८५२०२०२८७, ९८५२०५६७११, ९८५२०२३११५, ९८४२०२८०४९
पृष्ठहरु
लिंकहरू
हाम्रा बारेमा
पर्यटन यात्रा डट कम एउटा विशुद्ध पर्यटन न्युज पोर्टल हो । ‘विकासका लागि पर्यटन’ भन्ने मुल नारालाई सफल बनाउन पर्यटकीयस्थलहरूको समाचार, डकुमेन्टी, तस्बिरलगायतका सामग्रीहरूलाई बाहिर ल्याउनका लागि पर्यटन व्यवसायी र पत्रकारहरूको समूह मिलेर सुरु गरेको हो । यसमा पर्यटनका सबै खाले सामग्रीहरूलाई समेट्ने प्रयास गरिनेछ । साथै तपाईंहरूले समेत भिडियो र तस्बिरमा पर्यटनका प्रकाशन र प्रशारण योग्य सामग्री पठाउन सक्नु हुनेछ । त्यसका लागि हामीले मेरो तस्बिर र मेरो भिडियोका दुई कोलम राखेका छौं । त्यसमा तपाईंले paryatanyatrabrt@gmail.com मा सामग्री पठाउन सक्नु हुनेछ । ती सामग्री प्राथमिकताका साथ प्रकाशन तथा प्रशारण गर्नेछौं ।